Ing Dalan Ning Krus
(Stations of the Cross)

ING DALAN NING KRUS
(Via Crusis)
(Siklaud)
King lagyu ning Ibpa….
PAMANISI
O Dios ko,
Sisisian kung taimtim king pusu
Ing sablang pamikasala ku Keka,
At masukal ku lub karing anggang kasalanan ku
Uling pitatakutan kung mabating ya ing Ligaya Banwa
At kamtan ku ing lasa king impierno,
Dapot migit king sabla
Uling pikasalanan Daka, Dios ko,
A  mitmung kayapan
At mangaintulid king anggang lugud ku.
Tatantu kung matibe,
King saup ning Mal a grasya Mu,
Ing ikumpisal kung pamikasala
Tuntun king parusa,
At ibayu ing bie ku,
Amen.
(Talakad)

MUMUNANG ESTASYON
“I JESUS MIYATULAN YANG MATE”
(Siklaud ye ing bitis yung wanan)
MANIMJNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“AKU ING MAYAP A PASTUL. Ing mayap a pastul darau’na ing bie na karing tupa”.
…..Alang ninu mang makapagsamantala king kanakung bie…
Yampang ke iti ayun kanakung kaburian…..iti ya ing upayang binie ning Ibpa kanaku.” (San Juan 10:11, 18)
(Saglit a painawa’t migunam)
O Jesus, a meatul mate kang Pilatong alang lunus, inaku mu antimo ika mikasala ba mu kumung iligtas king alang anggang kamatayan. Pasalamatan  Daka king uli ning maragul mung lugud kanaku at yaduan ku Keka ing maging marapat ku sana king alang anggang bie.
S. GINUNG JESUS A MIPAKU, PAKALULWAN MU KAMI.

KADWANG ESTASYON
“ING PAMAMUSAN NANG JESUS KING KRUS”
(Siklaud ye ing bitis yung wanan)
MANIMUNA. Sasamban Daka Crhisto at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Ding kekatang keinan, at ya kabud ing mamusan king beyatan da, ding kekatang kalungkutan at ya ing menandaman kareti. (Isaias 53:4)
(Saglit painawa’t migunam)
O Jesus ko, a kababayatnan king Krus a meging mabayat uli ding sala ku, ipag-kalub Mu kanaku ing kalam Mu ita sanang e miraragdagan a bayat uli ding bayu kung kasalanan, at bustan mung pusanan ke ing kanakung krus ayun king espiritu ning tune pamag-penitensiya.
SABLA. GINUNG JESUS A MIPAKU, PAKALULWAN MU KAMI.

KATLUNG ESTASYON
“ING MUMUNA’NANG PANGASAKAB JESUS”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Miragsang masolu dapat kaku…. Dakal lang misisinup mua laban kanaku, ablasan da ing mayap king marawak, at para king katuliran ning kanakung parasan a liligalig kanaku.” (Psalmo 37:17-21)
(Saglit a painawa’t migunam)
Jesus ko, a misakab at makapatan king krus, sasamban Dakang antimong kanakung Dios angga king Kekang keinan. King uli ning pirandam mung sakit uli ning pangasakab  Mu, Dinan Mu ku king kalam Mu ban e’na  ku pasibayung mikasalang mabayat.
SABLA. GINUNG JESUS A MIPAKU, PAKALULWAN MU KAMI.

KAPAT A ESTASYON
“ I JESUS ASAGANAN NE ING MAGSALBAT NANG INDU”
(Siklaud ye ing bitis yung wanan)
MANIMUNA. Sasamban Daka Christo at layun papurian.
SABLA. ULING KING ULI NING BANAL MUNG KRUS INATBUS ME ING YATU.
“Pagmasdan yung masalese, ikong anggang daralan, at sabyan yu nung ati nang migit pang kalungkutan a antimo ing kanakung kalungkutan.” (Tagulele 1:12)
Jesus ko, a migsalbat inyang ikit meng malungkut ing mal mung Indu. Ing dakal kung kasalanan ya ing meging sangkan mung inya ika at ing mal mung Indu bina kong melungkut king maragul a kasakitan. King uli ning keang pamamilatan, gisingan mu kaku ing malungkut a panandam ban keta naman asisian kung mitmung kataimtiman ing sabla kung kasalanan.
SABLA. GINUNG JESUS A MIPAKU, PAKALULWAN MU KAMI.

KALIMANG ESTASYON
“ I SIMON NING SIRINEO SEUPA’NE I JESUS MAMUSAN KING KRUS”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Kakatmuan ku king kakung dake itang kakulangan na pa ning kasakita’nang Christo, king ulina ning keang katawan, Santa Iglesya.” (Colasas 1:24)
(Saglit a painawa’t migunam)
O Jesus ko, kapalad na nitang taung mipaintulutan sumaup mamusan king mabayat mung Krus! Bustan mung a tukyan Daka king dalan a painturu king Calvario kapamilata’ning pamamusan makatiman king Krus ning kasakitan.
SABLA. GINUNG JESUS A MIPAKU, PAKALULWAN MU KAMI.

KANAM A ESTASYON
“ I VERONICA PILISAN NE ING LUPA NANG JESUCHRISTO”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Atin waring pamikatawan a tutung e ustu panga-bubu a ala yang nanu mang itsura ampon leguan man… alang kakarinan keti, alang kapurian, alang leguan, uling ikami pagmasdan miya, ban sambutan na la ding pusu mi.” (Isaias 52:14; 53:2)
(Saglit painawa’t migunam)
Jesus ko, uli ning lugud Mu, milakwan kang bakas ning banal Mung lupa, king twalya o panyu na nitang malugud a Veronica a minulis king kamal-kamalan mung lupa. Makanyan mu naman bakasan me ing kanakung pusu at kaisipan king alang angga mung pamigaganaka uli ning kasakitan mung misna king pait.
SABLA. GINUNG JESUS A MIPAKU, PAKALULWAN MU KAMI.

KAPITUNG ESTASYON
“ I JESUS KING KADWANG PANGA BALDUG”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“ Iti king uli mu inia mekasagana kung pintas…. Metung a miugse libutad ding kanakung kapatad….” (Psalmo 68:7-9)
(Salit a painawa’t migunam)
O Jesus ko, mekatapilan ing pamamatawad mu kanaku, at mekatapilan ku menabu king pamikasala sumangid da ding dakal kung kapangakwan Keka? Pasiknangan muku libutad ning dakal a tuksu; at e’mu pabustan ing mikasala kung pasibayu Keka.
SABLA. GINUNG JESUS A MIPAKU, PAKALULWAN MU KAMI.
    
KAWALUNG ESTASYON
“ I JESUS ATAGPUAN NE ING BABAI NING JERUSALEM”
(Siklaud ye ing bitis yung wanan)
MANIMUNA. Sasamban Daka Christo at layun  pupurian.
SABLA. ULING KING ULI NING BANAL MUNG KRUS INATBUS ME ING YATU.
“ E king uli ku inia dapat kong manangis at magsalbat, babai ning Jerusalem; dapat kong manangis  at magsalbat king ulina ning sarili yu at ding anak yu.” (San Lukas: 23:28)
(Saglit a painawa’t migunam)
Jesus ko, magsalita ka kanaku antimo karetang babai ban aku naman lubus kong pagkalungkutan ding kasalanan ku. Dinan mu kung lua para king tune pamanisi, at bustan mung king kekang kasakitan  manakit kung pakinabang  para kaku .
SABLA. GINUNG JESUS A MIPAKU , PAKALULWAN MU KAMI.

KASIAM A ESTASYON
“ I JESUS KING KATLUNG PANGABALDUG”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Lawan mu nung makananu lang gagawang paralan ding kanakung kasalang ba rang asintang ing kanakung  bie, nung makananu ra kung susubsub king alikabuk” (Psalmo 142:3)
(Saglit a painawa’t migunam)
Jesus ko, uling ning meritus na ning kekang keinan, at kinguli ning pirandam mung sakit, pasiknangan muku laban king marok nang pita ning kanakung pamag-imbut nung sanu ing maging sangkan ban pisawili ku ing lugud mu ampon pamaki-kaluguran kanaku.
SABLA. GINUNG JESUS A MIPAKU , PAKALULWAN MU KAMI.

KAPULUNG ESTASYON
“ I JESUS LIBASAN DE IMALAN”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Maglubas naka, ngeni, king matua mung sarili a nung nu atatandanan mu ing kayang pamibie-bie… Ika dapat kang miblas king bayung bie, a melalang kalarawa’ na ning Dios, mipamayapan at meging banal kapamilita’ning katutuan.” (Esposo 4:22, 24)
(Saglit a painawa’t migunam)
Jesus ko, kapamilita’na ning dine pibabata mu iniang linubas daka at king ulina ning pait na nitang atdung binie ra at pepainum Keka, Ika inatbus mu ing kanakung pamikasala king kealang sampat at pilubluban at kealang pamangawat, pagkalungkutan ko reting kasalanan, at manibata’na ngeni ipangaku kung mie king kalinisan at pamag-banayad.
SABLA. GINUNG JESUS A MIPAKU, PAKALULWAN MU KAMI.
KALABING METUNG A ESTASYON
“ I JESUS MIPAKU YA KING KRUS”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL  MUNG KRUS INATBUS ME ING YATU.
“At inyang miras na la king lugal a mipamalagyuan bungu, pinaku re Karin; at antimurin ding aduang tulisan, ing metung atiu king bandang wanan at itang metung banda nang kaili, at I Jesus sinabi na Ibpa patawaran mula, uling e’ra balu ing daraptan da.” (San Lukas 23:33-34)
(Saglit a painawa’t migunam)
Jesus ko, a mikabit king Krus pauli ding paku karing gamat mu’t bitis, malulunus ku Keka busal ning pamibabata mung sakit. Ipaku me ing kanakung pusu king Krus bakung manatili Karin at ba ra Kang aluguran at kapilan man ena  kawaning pasibayu.
SABLA. GINUNG JESUS A MIPAKU, PAKALULWAN MU KAMI.

 

KALABING ADWANG ESTASYON
“ I JESUS METE YA BABO NING KRUS”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL  MUNG KRUS INATBUS ME ING YATU.
“Iti ya ing dalise at wagas a lugud ning tau a malyari nang apakilala, king ya dapat nang idaun ing bie na uli ra ding kayang kakaluguran .” (San Juan 15:13)
(Saglit a painawa’t migunam)
Jesus ko, a mete magsalbat uli ning lugud mukaku. Ing kekang kamatayan  ya ing kakung kapanenayan at tula. Mananu nasa ing aku maging matapat ku keka anggang mabie ku, ba keta king oras ning kanakung kamatayan, detang mebusbus mung palad panuanan daku.
SABLA. GINUNG JESUS A MIPAKU, PAKALULWAN MU KAMI.
(Tikdo tamu)
KALABING ATLUNG ESTASYON
“ I JESUS KILDAS DE KING KRUS”
(Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Ing Dios pepakilala na ing pakamal na kekatamu king pamag-daun Na king bie Na pauli tamu.” ( I San Juan 3:16)
(Saglit a painawa’t migunam)
O Indu ning kalungkutan, a king lunus at kipnuan daya ning katawan ning kaluguran a Anak atyu ngeni karing gamat mu, ipaniawad mu kung kalam ban e’ku ne miuman pang ipaku king Krus uli ning kakung pamikasala ampon e’ku ne pasibayu pang sugatan ing kekang sariling kaladua king tandus ning kalungkutan.
SABLA. GINUNG JESUS A MIPAKU, PAKALULWAN MU KAMI.
KALABING APAT A ESTASYON
“ ING PANGA-BILI NANG JESUS KING KUTKUTAN”
 (Siklaud ye ing bitis yung wanan)
MANIMUNA. Sasamban Daka Christo at layun pupurian.
SABLA. ULING KING ULI NING BANAL MUNG KRUS INATBUS ME ING YATU.
“Ing kamatayan ala neng upaya babo na; ing kamatayan a kemate nay a ing kamatayan, misan para karing sabla, ning kasalanan: ing bie a nung nuya mibibie ngening salukuyan ya ing bie makatangad king Dios.” (Roman 6:10)
(Saglit a painawa’t migunam)
Jesus ko, a mikutkut pauli ning pakamal mu kanaku, pasalamatan Daka uling migdusa ka king uli ku. Pagkalub mu sana king ing pusu ku maging tumpak yang pipainawan para king sagradu mung katawan potang tanggpan Daka king Banal Pamakinabang.
SABLA. GINUNG JESUS A MIPAKU, PAKALULWAN MUKAMI.
(Siklaud tamu)
King pamiparikil king Santong Ibpa:
Ibpa Mi….. Bapu Maria….. Glorya o Ligaya…

IPABALU
Nung sakali ati ko king dase na ning panandam o makarayu kayu karing bisitas o pisamban at atikayu king mikelangan a kabilyan, ing pamag-ESTASYON o VIA CRUSIS malyari yung arapat karing panalangin a taimtim: 20 Ibpa Mi, 20 Bapu Maria at 20 Glorya o Ligaya. ([email protected])